Duerch d'Notzung vun dëser Websäit erkläert dir Eech averstanen, datt mir Cookien notzen. Dës hëllefen eis Är Benotzer-Experienz ze verbesseren. Méi dozou

See PRO edition

 

COVID-19 // Ofso Open air Konstfestival 2020

Léif Frënn vun der Konst, vum Kiischpelt a vum Open air Konstfestival,

Mir hoffen et geet Eech alleguerte gutt - et gëtt an der aktueller Situatioun näischt méi Wichtiges ewéi d’Gesondheet. Leider muss den 30. Anniversaire vum Open air Konstfestival dofir och waarden.
An Ubetruecht vun der aktueller Entwécklung vun der COVID-19-Pandemie, an der Decisioun vun der Lëtzebuerger Regierung, all Manifestatioune bis den 31. Juli ze ënnersoen, gesäit den Organisatiounscomité sech verflicht d’Editioun 2020 ofzesoen.

Mir soen Eech Merci fir Äert Versteesdemech, an an der Hoffnung Eech nächst Joer um 30. Open air Konstfestival zu Lellgen begréissen ze däerfen.
Bei Froe sti mir Eech jidderzäit gären zur Dispositioun. Weider Informatiounen zum Virus an der aktueller Situatioun fannt Dir op der Websäit vun der Regierung - www.coronavirus.gouvernement.lu

Wat ?

Graffiti (och nach Tag genannt) ass ee Sammelbegrëff fir Zeechnungen esou ewéi Beschrëftungen an allméigleche Formen an op de verschiddensten Uewerflächen. Op eng gewëss Manéier existéiert dës Konstrichtung scho säit längst vergaangenen Deeg a seng Wierker enthalen oft entweder politesch oder sozial Aussoen a Kritiken, oder si brénge ganz einfach perséinlech Meenungen zum Ausdrock. Ze fannen ass Graffiti op Maueren, Zich, Brécken, Toillen, Miwwelstécker etc. D’Konstrichtung entwéckelt sech schëtzeg weider an der kënstleresche Vilfalt si praktësch keng Grenze gesat.

Während Graffiti fir déi eng definitiv an enger Galerie ausgestallt gehéiert, begéinen aner Leit dëser Konstrichtung éischter nach mat Skepsis. Villäicht ass et genau dëse polariséierenden Aspekt, deen esou ze faszinéiere weess. Ëmmerhin stëft Graffiti op dës Manéier weider douzou un, iwwer Dualitéit an Dualismus an der Konstwelt nozedenken, zwou grondleeënd Thematiken bei deenen et duerchaus ganz verschidden Usiichte gëtt. Am Endeffekt gëtt Graffiti als eng Form vu Konst mat praktesch onbegrenzter Fräiheet geschätzt, sief et seng Form oder de kënstlereschen Ausdrock.

Am Kader vu dësem Konstatelier kann ee sech op dës eenzegaarteg Aart a Weis ausdrécken, a virun allem, sech austoben.

Wou a wéini ?

Den 23. Juni 2020 vun 11.00 bis 17.30 Auer um Open Air Konstfestival zu Lellgen.

Wat gëtt alles gebueden ?

Ee Konstatelier zum Thema Graffiti op Toile fir Persounen vu 12 bis 20 Joer, ënnert der Leedung vum Daniel Mac Lloyd, Graffiti-Kënstler. Den Atelier gëtt op Lëtzebuergesch gehale.

An dësem kënstleresche Kader gëtt d’Méiglechkeet gebueden, vun der Skizz bis hin zum fäerdege Graffiti, den Ëmgang mat der Spraydous ze léieren, an esou säi ganz perséinlecht Wierk unzefäerdegen.

Déi am Verlaf vum Atelier entstane Wierker ginn an de Concours « Art Academy » opgeholl, an d’Visiteure vum Konstfestival den 23. Juni bestëmmen dann déi schéinst Wierker dorënner. Déi éischt, zweet an drëtt Plaz bei dëser Ofstëmmung gi mat engem Präis ausgezeechent.

D’Präisiwwerreechung fënnt de Samsden, 27. Juni 2020, um 19.00 Auer zu Lellgen an der Hencksescheier statt. Zu dëser Geleeënheet kënnen dann och alleguer d’Participante vum Konstatelier déi entstane Wierker ofhuelen.

Präis ?

85 € fir d’Animatioun an d’Betreiung vun 11.00 bis 17.30 Auer, do si Material esou wéi ee Mëttegiessen a Gedrénks abegraff. D’Iwwerweisung vun den 85€ an 30 Deeg no der Aschreiwung gëlt als definitiv Umeldung.

Wéi geet d’Umeldung ?

D’Aschreiwung ass hei um Site bis spéitstens den 6. Juni 2020 méiglech. Weider méi detailléiert Informatioune loosse mir Iech no der Aschreiwung zoukommen. Aus organisatoresche Grënn géife mir Iech bieden Är Kanner respektiv Iech nëmmen dann unzemellen, wa si respektiv Dir um kompletten Konstatelier vun 11.00 bis 17.30 kënnen deelhuelen.

 Open air

Konstfestival 2020

cancelled !

 
      Gemeng Kiischpelt 

Lellgen ? 

 Wéi kommen ech op Lellgen?

Gidd méi gewuer iwwer dat klengt, iwwer d'Grenze vun eisem Land eraus bekannten Ardennerduerf.